Euskadin pandemiak izan duen bilakaera ona ikusita, Osasun Sailak lau agindu indargabetu ditu salbuespenezko neurriekin
Español Valencià Català Gallego Euskera English
Aktualitateko eta azken orduko berriak. Tokiko eta eskualdeko berriak <strong>Vitoria Gasteiz</strong>en Vitoria Gasteiz

Euskadin pandemiak izan duen bilakaera ona ikusita, Osasun Sailak lau agindu indargabetu ditu salbuespenezko neurriekin

Atzo, 109 kasu positibo eta bi heriotza izan ziren Araban

Euskadin pandemiak izan duen bilakaera ona ikusita, Osasun Sailak lau agindu indargabetu ditu salbuespenezko neurriekin ostirala, 2020(e)ko ekainaren 5a

Euskadin pandemiak izan duen bilakaera ona ikusita, Osasun Sailak lau agindu indargabetu ditu salbuespenezko neurriekin.

Zehazki, Osasuneko sailburu Nekane Murgak sinatutako lau arau indargabetu dira. Lehenik eta behin, koronabirusak eragindako laguntza-jardueraren areagotzeari aurre egiteko beharrezkoak ziren baliabide pribatu guztiak erabiltzea eta premiarik txikiena zuten eta pandemia transmititzeko arriskua areagotu zezaketen zerbitzuak atzeratzea ahalbidetu zuen martxoaren 24ko agindua indargabetu da. Horri esker, besteak beste, erakunde pribatuek beren jarduera programatua hasi ahal izango dute.

Ildo beretik, bertan behera uzten da martxoaren 18ko agindua, zeinaren bidez eratu zen ezohiko egoerak iraun bitartean Euskadin eskura zeuden baliabide guztiak (osasunari, gestioari eta boluntariotzari lotutakoak) kudeatu eta koordinatzea xede zuen Zuzendaritza Batzordea.

Era berean, arriskuak txikiagotzeko helburuarekin hileta-osasunaren arloko ezohiko neurriak (tanatopraxiako esku-hartzeei zein gaubeilei eta zeremonia zibil eta erlijiosoei –hileta-izaerakoak barne– lotutakoak) ezarri zituen martxoaren 26ko agindua indargabetu da.

Bertan behera geratu den laugarren agindua apirilaren 6koa da. Agindu horren bidez, nekazaritza eta abeltzaintzako elikagaiak eta produktuak zuzenean saltzeko azoka eta feria tradizionalak aldi baterako eten ziren, eta denda-ibilgailuen bidezko saltoki ibiltarien jarduera arautu zen.

Indargabetze horiek Euskadin normaltasunera itzultzeko egiten ari den deskonfinamendu progresiboaren testuinguruan kokatu behar dira, betiere COVID-19aren bilakaera epidemikoa kontuan hartuta. Horri dagokionez, konpromiso eta erantzukizun indibidual eta kolektiboari eustearen garrantzia azpimarratu behar da beste behin. Ildo horretan, Osasuneko sailburu Nekane Murgak atzo aurkeztu zuen Euskadin koronabirusaren transmisioa prebenitzeko gomendioen gidaliburuan bildutako gomendioak zorrotz betetzeko eskatu du Osasun Sailak. Datozen egunetan, gidaliburu horren 350.000 liburuxka baino gehiago banatuko dira Osakidetzako zentroetan, farmazietan eta euskal udalerrietan. Halaber, bertsio digitalean egongo da eskuragarri, www.euskadi.eus/coronavirus webgunean.

Arau-indargabetze horiez gain, epe horretan hainbat hotel eta apartamentu jarri dira osasun-agintaritzaren esku, osasun-profesionalak nahiz COVID paziente arinenak hartzeko. Horietako bat, jada pazienterik ez dituena, Gran Hotel Lakua da eta Osasun Sailak eskerrak eman nahi dizkio COVID-19aren sintomatologia arineko pazienteak hartu dituen aldian bertako langile guztiek eta zuzendaritzak eskaini duten zerbitzu, tratu eta elkartasun bikainagatik. Igandera arte, guztira 187 paziente hartu dituzte establezimendu horretan. Establezimenduaren desinfekzioa atzo amaitu zen, eta Osakidetzako Arabako ESIko 46 profesionalek hartu zuten parte lan horretan.
 
COVID-19 DATUEN EGUNERATZEA EUSKADIN

Egindako probak
Euskadin, 115.593 PCR eta 61.416 test azkar edo serologiko egin dira orotara. Atzo, 20:00ak arte, 8.618 proba egin ziren guztira.
 
Baieztatutako kasuak
Pandemia hasi zenetik atzoko 20:00ak arte, baieztatutako koronabirus-kasuen kopurua 16.679 da, eta, horietatik, %76,4 osatuta edo alta emanda daude.

 
Positiboen eta ospitaleen egoera
Orain arte, 1.364 heriotza gertatu dira guztira, eta, horietatik, 11 erregistratu ziren atzo.
Horrez gain, 584 pertsona daude ospitaleratuta, eta, horietatik, 504 solairuko geletan daude, eta 80 ZIUn.
 
Eguneratzea, maiatzak 5 Ospitaleratuta dauden pertsonak Hildako pertsonak Kasu positiboak, GUZTIRA
ARABA 144 348 4.397
BIZKAIA 327 746 9.461
GIPUZKOA 113 270 2.821
EUSKADI GUZTIRA 584 1.364 16.679
 

Lagundu:Eusko Jaurlaritza - Gobierno Vasco.  Kultura Saila
PORTALDETUCIUDAD.com Portal Sarea
Erabilera baldintzak - Pribatutasun politika - Cookieen politika